Universiteti i Tiranës dhe Universiteti Bujqësor i Kamzës nënshkruan një marrëveshje bashkëpunimi me Universitetin e Torinos. Marrëveshja që u firmos nga rektori i UT-së, Dhori Kule, rektori i UBT-së, Fatos Harizaj dhe rektori i Universitetit të Torinos, Enzo Palizetti, parashikon shkëmbimin e eksperiencave dypalëshe, specializimin e pedagogëve shqiptarë në Torino, shumë lehtësira për studentët shqiptarë që kërkojnë të specializohen në Itali etj. Universiteti Politeknik i Torinos është ndër më të njohurit në Evropë, ndërsa iniciativa është propozuar nga Konsulli i Nderit në Torino, Giovani Firera, i cili është shumë aktiv në çështjet e bashkëpunimit mes italianëve dhe shqiptarëve. Kjo është hera e dytë që Konsullata e Torinos mundëson nënshkrimin e marrëveshjeve të këtij lloji me Universitetet Italiane dhe homologët e tyre në Shqipëri. Të pranishëm në am- bientet e rektoratit ishin gjithashtu pedagogë e stu- dentë, si dhe ambasadori Italian në Shqipëri, Saba D’Elia dhe presidenti i Republikës së Shqipërisë, Bamir Topi. “Marrëveshje të tilla ndihmojnë Shqipërinë për t’u afruar me standardet evropiane. Ne, sikurse ju e dini, jemi kontribues të vendit tuaj në këtë aspekt dhe në sajë të kësaj marrëveshjeje, ky proces mund të përshpejtohet”, tha ambasadori italian në Sh- qipëri, Saba D’Elia, në fjalën e tij. Ndërkaq, kreu i shtetit Bamir Topi, kërkoi më tepër kualifikim dhe standarde në arsimin e lartë. Sipas tij, sistemi arsimor ka ndryshuar, por ka ende probleme. “Universitetet duhet të marrin parasysh edhe tregun e punës. Standardet duhet të shtrihen në veçanti në arsimin e lartë privat, shumë prej së cilëve nuk plotësojnë standardet e universiteteve evropiane”, theksoi presidenti Bamir Topi, duke shtuar se së shpejti do të çelet në Shqipëri dega e Diplomacisë. Po kështu, gjatë fjalës së tij ai hodhi idenë e krijimit të një instituti për formimin e diplomatëve, pasi vendit tonë i duhet një i tillë.